CYMA Report - Darlawn (Darlawn Branch YMA)

YOUNG MIZO ASSOCIATION

DARLAWN BRANCH

 

   Dated Darlawn: The 18th August 2018

_________________________________________________

1. KHUA :  Darlawn

( Darlawn Branch YMA )

2. TOBUL : 1.Din kum – 1902

   2.Indin Tan dan – Darlawn khua hi Sailo lal Lallula fapa Lallianvunga thlahte khua a ni a.Lallianngura fapa Lalngura fa Vanpuilala khawlian tlanga a awma, a thih hnuin a nu Lalhlupuii chuan Darlawn tlang hi a rawn zuan thla a,Hmunpui an tihah khian in 300 khuain an awm a.Vanpuilala fapa neihchhun Lalhleia chu a nu Chawngpuitualin Vanbawng ah a awmpui; Kum 1877 ah Ratu ah an kai thla a.Kum 1879 ah Sailutar ah leh Hnahsepah an rawn insawn phei a,a hnu kum hnih lek ah hmar lamah an insawn phei leh a.Sukte ral a vangin Lalhleia pu Pawihbawiha belin Khawruhlianah an phei a, kum 1890 ah Vailianin an khua an hal sak a,Kelzamah an chhuka,Hmuizawl ah an kai leh a.Hmuizawla an awm lai chuan Tangkaburhah a then an kai a,Lalhleia fapa Thuamluaia indanna tur a kai an ni; nimahsela Thuamluiaia chu Tlangval mai a la nih avangin Tangkaburh chu a awp lo. Lalhleia chu Sawleng ah a kai chho va,kum 1902-ah Ratu ah a kai phei leh a.Chumi rual chuan Bawrhsap J.Shakepeare-a’n Thuamluaia chu lalna lehkha a pe a,Sawleng leh Darlawn ram hi a ram atan a ti a; tichuan Tangkaburha awm ho te chu ko chhovin darlawn Bangla vengah hian an awm ta a: chuta tang chuan tun thleng hian Darlawn khua chu mei mit lovin a ding hlen ta a ni.

3. Din tu – Thuamluaia,Sailo lal.

3. KHUA/VENG CHANCHIN : Darlawn hi Mizoram hmar lam Tipaimukh road a awm a ni a,hmar tlangdung ah chuan khawpui lian ber a ni. Aizawl atang Km 123 a hlaa awm a ni a,NH-150 in a paltlang a ni.Tuipui zawl atanga teh a feet 3500 a sang,boruak nuam leh thengthaw,zo leh phai thlai te pawhin an thatpui kawp theihna hmun a awm a ni. Ralte hnahthlak an tam ber a,tun hma deuh phei kha chuan Ralte khawpui tih thin hial a ni.

Thil chhinchhiah tlak : SA UI TAN KAWN

Kum 1887 ah khan tuna Darlawn ram Hnahsep hmun ah Thanghulha’n khua a din a. A piah lawk keldaidan lek ah Lalhleia Sailo lal khua Sailutar a awm bawk a,an khua an inzat deuh reng a ni.Thanghulha’n hetia Hnahsep hmuna khua a rawn din mai hi a piah a khua te hian dip deuh in an hria  ani maithei,Lalpuiliana leh Lallianvunga thlahte thin a dam thei ta lo a,Thanghulha khua hi nek chhuah an tum ta a,an indo phah ta hial a,hei hi ‘Chhak leh Thlang Indo’ an vuah a ni.Nasa taka harsatna an tawk dawn ni a an hriat tak avang in inrem zai an rel ta a,an inrem tih entir nan Hnahsep leh Sailutar inkar kawn ah Sa-ui an tan ta a ni.Helai hmun hi tun thleng in Darlawn Joint YMA in a la humhalh tlat a ni.

Darlawn khaw mipui hi atam zawk chu kut hnathawk a, lo neih a eizawng an ni a.Kut themthiam thil avang a eizawng engemaw zat an awm bawk a ni.Sawrkar hnathawk a eizawng tam tak an awm bawk a,khaw taima ve tak kan nih avangin ei leh bar zawnna kawng ah harsatna lutuk a awmlo niin a lang.

4. KHAW MI,MI HMINGTHA LEH CHHUANAWM – 

Infiamna lam ah - Pu Lalsawmliana Sailo :Kum 1986 ah khan Judo (Middle Weight) ah India ramah Champion in,World Championship Munich a khel tura thlan a ni a,mahse chhungkua ah thihna a thlen avangin a kal thei ta lo a ni. Tin,Kum 1991 ah khan Boxing (Middle weight) ah East Zone ah a champion bawk a ni.

                                       Sd/-

                   (JESSIE LALCHHANHIMA)

                                  Secretary

                     Darlawn Branch YMA

 

Note : CYMA in mahni khua/Branch chanchin tawi fel deuh a report tur a min tih ang in,report hi siam a ni a.Lo diklo lai leh fello lai deuh a awm a nih chuan  in mi hriatthiamna ka han dil nghal e.